A ESPERA DAS RESPOSTAS DA EMPRESA

• Prevalecen as vacacións sobre a formación.
• Terceiro concurso para o servizo de cafetería.

Na xuntanza mantida coa empresa no ámbito da Comisión de Formación dende CCOO plantexou os problemas e deficiencias que os compañeiros e compañeiras nos quixeron achegar De todas esas dubidas a empresa quedou de dar cumprida resposta por escrito. Ao que si afirmou é que en caso de que as vacacións coincidan coa formación terán prioridade as vacacións e cando os cursos coincidan en días libres ou coa prolongación de xornada vaise compensar conforme ao convenio colectivo.

CCOO segue defendendo que a igual categoría igual formación. Un dos problemas que antes se puxo enriba da mesa foi a dos operadores montadores de vídeo que quedaban segregados en dous grupos con dúas formacións diferentes. Isto dende recursos humanos asegurouse que xa estaba corrixido e que só había problemas coas persoas que traballan en continuidade. Nesa xuntanza tamén RRHH afirmou que na redacción da TVG vai haber 5 postos de inxesta e 5 de postproducción.

Dende CCOO tamén seguimos coa teima de que se forme tamén ao persoal da Radio Galega, xa que hai casos nos que traballadoras ou traballadores da RG están na TVG e viceversa, máxime despois da conversión en corporación que nos equipara a todos.

CCOO quere deixar claro que defende que a formación non vai configurar a nova clasificación profesional, e así o imos defender nas distintas mesas negociadoras.

No tocante ao servizo de cafetería e comedor a CRTVG vai sacar un terceiro concurso público despois de non chegar a acordo coa actual empresa. O servizo rematará o 31 de outubro. Estase a espera de poder chegar a un acordo de prórroga de servizo e traballando en alternativas. Unha que se puxo enriba da mesa foi a contratación dun servizo de máquinas con pratos precociñados que se quentan en microondas, unha proposta que dende a parte social non ve como unha solución viable. O novo prego prevé un incremento no que chaman a axuda ao custe, que é pagarlle a empresa unha subvención por restar o servizo e un incremento nos prezos.

ASAMBLEA FRONTE A MAQUINARIA ASOBALLADORA DA DIRECIÓN

• Dixitalización, creación de novas categoría “de facto”.
• Clasificación profesional unha realidade incómoda.
• Cadro de persoal ou a escusa dos indefinidos.
• A semana que ven nova asemblea para ver as accións a tomar.

Na asemblea celebrada hoxe achegouse a información que nesta semana nos foi propoñendo a empresa. Por unha banda detectamos que aproveitando da dixitalización dende a dirección queren aproveitar para reconvertir as funcións de traballadoras e traballadores. Empregando como ferramenta a formación para a nova tecnoloxía pretenden crear empregados e empregadas de primeira e segunda unha situación que non vai consentir a parte social. A formación terá que ser igual para todos os traballadoras e traballadores da mesma categoría. A empresa xa actuou de xeito unilateral colgou na intranet as quendas para a formación e enviou os correos aos aspirantes nas listaxes advertindo de que non comparecer a formación quedarán en suspenso, estes dous puntos en contra da representación sindical. Expúxose a intención do Comité de denunciar esta situación pola vulneración dos artigos 87 e 88,1 do convenio colectivo.

No tocante a clasificación profesional abordouse a pretensión da empresa de crear dúas novas categorías: a do grupo soporte e operador de media. Unha pretensión da empresa da que dende a parte sindical está en contra porque entende que hai que renegociar unha unha clasificación que defina categorías nas e novas funcións xa que as existentes agora mesmo están obsoletas e moito máis obsoletas quedarán despois da dixitalización.

Tamén se falou da proposta de cadro de persoal que fixo a empresa ao ampara de dar cabida as sentenzas de indefinidos. Unhas sentenzas as que a parte social non se opón que se creen pero si se opón a que os postos de traballo os distribúa RRHH segundo lle pete que é o que pretenden. Dende a parte social quere que se cree cada praza segundo cada sentenza e no centro de trabalo ao que fai referencia.

Durante a asemblea por parte de distintos traballadores presentáronse distintas problemáticas como que os traballadores e traballadoras da Radio Galega non terán a mesma formación na dixitalización aínda que coa entrada en vigor da Corporación están amparados polos mesmos dereitos e obrigas.

Moitas contradicións e problemas como o dos compañeiros dos departamentos técnicos que aseguraron que están desbordados polos procesos de dixitalización, outro como que os realizadores teñen menos horas de formación que os axudantes de realización ou que técnicos electrónicos teñen máis da metade de horas de formación sobre contidos dos que xa están formados.

Dende a parte sindical tomouse nota para plantexar estes asuntos nas mesas dos comités con RRHH e convocar unha nova asemblea a semana que ven e ver que contestación por parte dos traballares se poden tomar. 

NON A NOVA PROPOSTA DE VACACIÓNS

Resposta unánime contra o apercibimento dunha traballadora

O Comité de San Marco rexeitouse por unanimidade a pretensión de RRHH de non conceder vacacións en decembro no departamento de informativos. Acordouse transmitirlle a empresa o rexeitamento da proposta de non conceder vacacións durante a tempada de Nadal. Esixirlle a RRHH que cumpra o artigo 40 do Convenio Colectivo, que non caso de denegar a vacacións se argumente por escrito, que se estableza un porcentaxe e que se rote se hai coincidencias en anos sucesivos, que no tocante a concesión de vacacións en períodos inferiores a 5 días a parte social non se opón sempre que sexa para todos os traballadores e traballadoras por igual, que se hai problemas para xestionar a través da ferramenta informática as vacacións se soliciten con formularios por escrito.

Tamén de xeito unánime se opuxo o Comité ao apercibimento por escrito dunha compañeira de CCOO polo emprego de tres planos onde saída a redacción da TVG nunha información sobre o síndrome post vacacional. E presentouse un escrito a dirección de RRHH de onde se enviou a notificación, a Direción Xeral de onde saíu a orde e ao Consello de Administración.

Despois de ter coñecemento do escrito enviado por vostede a Dona DGC dende o Comité de San Marcos

SOLICITAMOS:

Que a dirección de Recursos Humanos aclare se dito escrito é un apercibimento recollido dentro do Convenio Colectivo no artigo 92 correspondente a unha falta leve.

Do mesmo xeito queremos deixar constancia de que:

1.- Nin dende a dirección do programa Galicia Noticias, nin dende a dirección do departamento de Informativos se lle notificou queixa algunha pola elaboración da información a Dona DGC, departamento directamente competente na materia que nos ocupa.

2.- Non existe ningunha instrución por parte da CRTVG para o uso das imaxes gravadas na redacción ou en calquera outra instalación para a elaboración de pezas informativas.

3.- Solicitamos que se dean instrucións por escrito, claras e sen que poida haber interpretación a hora de empregar as imaxes da Corporación. Describindo quen as pode empregar e cando. En que informacións e baixo a autorización de que dirección. Isto que non deixa de ser unha anécdota pode carrexar problemas importantes no futuro para máis traballadores e traballadoras. Aproveitamos tamén para lembrarlles que na Corporación non existe un Manual de Estilo, nin Estatuto Profesional que regule o tratamento informativo e unhas normas claras polas que se deban rexer os traballadores e traballadoras.

4.- A inclusión de traballadoras e traballadores facendo as súa tarefas cotiás emprégase de xeito xeneralizado nas distintas pezas informativas que se elaboran a diario na redacción, xa sexa para falar do síndrome post vacacional, para a adición a Internet ou calquera outra información a miúdo que presenta dificultades para ilustrar graficamente o que se está a contar no texto.

5.- A información elaborada por Dona DGC non induce a erro ningún na mensaxe que se está a tratar que é a síndrome post vacacional un cadro de estrés ou fatiga que sofren algunhas persoas so volver das vacacións. Afirmar que hai un emprego mais aló da intención de informar é, ademais de incorrecto, unha falla de respecto a profesionalidade desta traballadora que leva 17 anos sacando adiante un programa con contidos de moi difícil elaboración.

6.- Este é con diferencia un asunto menor fronte a problemas reais que sí prexudican a reputación da CRTVG. Non hai máis que botar unha ollada as repetidas queixas sobre a manipulación informativa que dende distintos eidos se denuncian e que ven sendo, lamentablemente, un tema recorrente nas comparecencias do director xeral na Comisión da CRTVG no Parlamento.

7.- Na mesma información saen traballadores doutras empresas como é un repartidor dunha empresa de transporte ou un camareiro dun bar e non por iso consideramos que se está danando a súa imaxe.

8.- Constatamos e subliñamos que Dona DGC sempre é dilixente no seu traballo, tanto no se que se refire a CRTVG, como a calquera outro aspecto que afecte a persoas, empresas ou entidades. A súa honorabilidade e ética profesional está fora de toda dúbida.

9.- De ser considerado falta leve advertimos de que non se cumpriu o procedemento regulado no convenio polo que o apercibimento é totalmente improcedente, ademais de non estar tipificado dentro do regulamento. E de non ser considerado como sanción vemos de todo fora de lugar que dende o departamento de Recursos Humanos se emita un xuízo de valor sobre un contido puramente informativo, sendo o departamento competente a dirección de Informativos.

NON AO CADRO DE PERSOAL PROPOSTO POR RRHH

Acordo para sentarse a negociar a estrutura dos distintos centros de traballo

Reunido o Comité Intercentros con RRHH abordouse o cadro de persoal proposto pola empresa. Dende a dirección defenden que é un cadro que ven dado polas sentencias de indefinidos en distintos postos. Pola parte sindical rexeitouse de xeito unánime ese cadro por entender que o que fan realmente é adxudicar as prazas creadas por sentencias a postos e categorías que eles queren, aumentando nunhas e eliminando outras, sen aclarar que criterio están a seguir, polo que non acatan estritamente a legalidade. Dende a parte social defendeuse que cada sentencia crea un posto concreto nun centro de traballo concreto e ten que ser esa e só esa a praza que se ten que cubrir e non outra que dende RRHH queiran crear. . Por parte da empresa aseguran que están a elaborar un informe xurídico que apoia esta proposta que será remitido a parte social nuns días. Os representantes dos traballadores deixamos claro que o Consello de Administración, que é quen ten que aprobar o cadro, non vai contar coa complicidade do Comité Intercentros para xustificar esta manobra que consideramos irregular.

Dentro do debate xerado dende a dirección de recursos humanos comprometéronse a manter unha xuntanza a dez días vista para abordar unha negociación na que se revisará as necesidades dos distintos centros de traballo ao abeiro da adicional cuarta do convenio colectivo que di : “....a empresa e o Comité Intercentros ou a representación sindical negociarán unha proposta de actualización do cadro de persoal, e tamén negociarán a dimensión do cadro de persoal dos distintos centros de traballo detectando as vacantes existentes para proceder, de ser o caso, á súa cobertura polos procedementos adecuados, dentro do marco legal existente e cos prazos que se acorden”. Nesa negociación terase en conta as vacantes que se van xerar por xubilación ata o 2022, ademais dos postos que están en suspensión e sen cubrir, así como os contratos por obra e os contratos artísticos que están en activo

NOVA PROPOSTA DE VACACIÓNS

• A cafetería a punto de pechar definitivamente
• Presentan a programación sen explicacións
• Coordinadores a perpetuidade

Dende Recursos Humanos puxeron sobre a mesa novidades sobre a petición de vacacións. Como que aceptan que se poida pedir só unha opción con tres períodos. Que en Informativos non aceptarán que se pidan vacacións dende o 23 de decembro ao 7 de xaneiro, pero permitirán coller dous días de libranza que se poden pegar aos festivos que non se traballen e seguen mantendo o criterio que non se concederán días soltos. Como xa dixeron os período de petición de vacacións abrirase en xaneiro e durará ata abril e asumiron que as persoas que non fagan a súa solicitude nestas datas a empresa adxudicaralle as vacacións. Estudarán a posibilidade de que o programa informático recolla o dereito dos traballadores que cumpran anos de antigüidade que xeren dereito a máis días de vacacións se contemple na aplicación, unha aplicación, por outra banda, que só estará operativa o ano que ven porque está previsto cambiala e mellorala. A parte social quedou de valorar estas propostas para dar unha resposta á empresa.

En canto a cafetería acabou o prazo para a presentación de solicitudes e só se presentou a actual concesionaria. Rematado o prazo de concurso agora estamos nun prazo de procedemento aberto no que se modifican de xeito limitado as condicións do prego, unhas condicións que a empresa non vai acepta, porque suporía un incremento de máis do 100% da axuda ao custo que outorga a CRTVG a concesionaria que actualmente é de 42,000 euros.

No referente a programación, non fixeron máis que presentar unha documentación sen máis explicacións, xa que a presentou o departamento de RRHH. Dende a parte social fíxolles saber que necesitábamos uns interlocutores válidos para explicar polo miúdo, que vai facer que. Tamén que se pediu que se facilitara a información dos contidos web que xera a Compañía. Quedamos pendentes dunha nova convocatoria.

Tamén se pediu información sobre o traballo que desempeñan antigos coordinadores cesados, que como Xosé Manuel Maseda, Rosa Martínez, Javier Valderrama e Fernando Rodriguez Madriñán. Dende RRHH din que regresaron as prazas da súa categoría, malia que están pendentes de uns nomeamentos que están se aprobar. Polo que vimos que pasarán a ser coordinadores falta sabe de que, unha especie de condena que algunhas persoas vese teñen a perpetuidade. Polo visto o importante é coordinar, o de menos é o que.

COMEZAN OS CHAMAMENTOS PARA A FORMACIÓN NAS LISTAXES DE CONTRATACIÓN

A empresa informou que vai comezar de xeito inminente os chamamentos nas listaxes de contratación para a formación no proceso da conversión dixital. Nesta primeira fase serán 25 redactores e 15 reporteiros gráficos con 23 horas de formación por categoría e tamén 15 axudantes de realización que terán 49 horas de formación. Os horarios serán en xornadas intensivas de sábado e domingo. No caso dos reporteiros serán do outubro a novembro e no caso de redactores e axudantes de outubro a xaneiro. Dende a empresa aseguran que son os

A parte sindical rexeitou de xeito unánime a pretensión da empresa de suspender de xeito temporal a aquelas persoas que non realicen estes cursos ata que completen a súa formación.

As persoas que no momento de impartirse os cursos estean a traballar teñen dereito a completar a formación. A empresa comprometeuse a iniciar os chamamentos das listaxes evitando as contratacións indefinidas e revezamentos, xa que ao ser de longa duración están contemplados dentro do calendario xeral de formación, e incluír aos aspirantes que, aínda tendo contrato agora, queden sen contrato para outubro xa que serán os que ocupen os primeiros postos. Con isto quérese favorecer unha formación ordenada respectando a orde das listaxes.

NON A DISCRIMINACIÓN DOS MONTADORES

A empresa quere crear unha nova categoría de nivel 3 para o grupo de soporte

Reunido o Comité Intercentros con RRHH falouse do futuro dos montadores. A empresa querer segregar en dous grupos con distinta formación para crear un operador de media, que tería 64 horas de formación, e un operador de inxesta, con 35. Segundo a empresa queren que sexa un proceso voluntario e que se hai máis solicitantes que prazas establecer uns criterios para seleccionar aos aspirantes. Non terían distinto salario pero si distintas funcións. Dende a representación sindical deixouse claro de xeito unánime que a formación ten que ser igual para todos, que non se vai consentir una desigualdade que pode xerar nun futuro discriminacións. De tódolos xeitos emprazouse a empresa a que convoque a comisión de clasificación profesional para negociar o particular, ademais de pedir máis información sobre as funcións que van facer os distintos grupos.

Tamén quere crear unha nova categoría de nivel tres para que sería o denominado “grupo soporte” formado por 10 persoas. Serían os encargados de solucionar as incidencias que tería que ver coa dixitalización, tal e como fan agora os compañeiros e compañeiras do servizo de informática, pero especializados nos novos soportes dixitais. Terán unha formación de 250 horas e estaría aberta nun principio a calquera categoría. Queren que sexa un grupo permanente. Un tema que quedou aprazado tamén para a comisión de clasificación profesional a espera de máis información sobre as funcións e de como se vai facer unha promoción interna para a xente que queira optar a eses postos, cousa que ao parecer non tiñan previsto malia estar a menos dun mes de que comece a formación.

Na xuntanza do día de hoxe do Comité Intercentros falamos da paralización das solicitudes de xubilación parcial que se produciu en agosto por parte dos traballadores ao coñecer que non lles ían pagar os complementos que están a recibir. A directora de Recursos Humanos quedou de informar despois dunha xuntanza que tiña previsto manter o 28 de agosto do director xeral, que, ao parecer, ten prevista unha remodelación dos complementos a todos os niveis. Unha información que aínda está pendente.

No referente ao cadro de persoal presentado pola empresa co argumento de que é para axeitar o cadro do persoal as sentencias xudiciais, acordouse rexeitar a proposta por considerar que amortiza prazas e que non se axusta as necesidades da empresa. Acordouse manter unha novas xuntanza para abordar este tema xunto coa clasificación profesional.

Acordouse por votación que o Comité Intercentros poida asistir as xuntanzas de información sobre a programación, pedir a empresa unha relación dos novos coordinadores coa área na que están e as funcións que exercen ademais dun listado dos horarios actualizados onde queden reflectidos todos os cambios de quenda que se están a producir.

Tamén se vai que pedir a dirección que de as pautas para os traballadores e traballadoras que lles soliciten traballar para a Radio Galega sendo da TVG ou para a TVG sendo da Radio Galega. Déronse e danse casos nos que se lles esixe a persoas que cubra informacións para os distintos medios. Polo que se lle pide que se estipulen uns criterios e se imparta formación nos casos que sexa necesario.

PEDIMOS INFORMACIÓN DA PROGRAMACIÓN E UNHA XUNTANZA CON RECURSOS HUMANOS

No Comité de San Marcos acordouse denunciar publicamente a cobertura que fixo a TVG sobre a ocupación simbólica do Pazo de Meirás do pasado 30 de agosto, por entendela mínima.

Con RRHH tramitouse solicitude de información sobre os cambios na quenda de fin de semana nas categorías de redactor e montador. Na que se insta a empresa a respectar a orde de solicitudes existentes.

Entre outros temas a tratar coa dirección da CRTVG está a nova programación de outono na que se pedirá información sobre o tipo de relación contractual que hai cos diferentes traballadores e traballadoras que fan programas para a RG, como se vai facer un novo programa de debate que se emitirá simultaneamente na TVG e RG, como vai ser o traballo de varias persoas que van simultanear o traballo na TVG e RG, as funcións que teñen algúns dos xefes e xefas cesados e a área que ocupan outros que asumiron novas funcións. 

A VOLTAS COAS VACACIÓNS

A empresa di estar a traballar para non quedar sen servizo de cafetería

Na reunión coa empresa dende RRHH din que van cumprir o convenio colectivo no referente as vacacións. As solicitudes faranse do 1 de xaneiro ao 31 de marzo, e publicaranas o 15 de agosto. Una solicitude que será única, aínda que se poida partir en tres fraccións. Dende a empresa din que para o próximo ano van poñer un novo programa informático que elimine as limitacións que tiña o anterior. Van estudar a concesión de períodos inferiores a 5 días e as solicitudes en decembro. Estas últimas a parte social deixou claro que non se pode impedir presentalas, despois é prerrogativa da empresa denegalas, sempre por escrito e argumentando os motivos.

No relativo a cafetería o concurso para facerse cargo do servizo rematou o 22 de agosto e quedou deserto. A CRTVG está a traballar un procedemento negociado para mellor as condicións do concurso ata onde lle permite a lei que consiste no incremento dun 10% do canon que pagan ao adxudicatario para facer máis atractiva a oferta. Agora mesmo están a espera de que responda a actual concesionaria para despois poder facer a mesma oferta a outras empresas.

A FALSEDADE DA TVG

DIRECTOS FALSOS DAN PASO A INFORMACIÓNS GRAVADAS HORAS ANTES

Nas últimas semanas dende o sindicato CCOO vimos detectando que nos espazos informativos da televisión pública de tódolos galegos se está empregando unha estratexia para presentar informacións dicindo que son en directo cando son gravadas. Todo consiste en que as xornalistas ou os xornalistas se poñen diante da cámara e simulan que están en directo e que presentan un vídeo. Iso grávase e despois os presentadores dende o plató danlles paso dicindo que están en directo. Algo que pouco ten que ver co carácter inmediato e de veracidade que se lle debe esixir aos contidos informativos.

Unha situación que xa non só se repite en profesionais que están atendendo a un programa concreto, senón que agora vemos como a redactores e redactoras da mañá se lles obriga a facer este tipo de traballo para os informativos da tarde, argumentando que para os programas so seran non teñen persoal suficiente para cubrir a emisión.

Dende CCOO queremos denunciar primeiro, e máis grave, que o emprego deste sistema de traballo é un xeito lamentable de enganar ao espectador, presentando como directo información que xa levan horas feitas. Un xeito de manipulación máis dos que vimos denunciando durante anos. Polo que pedimos que se erradique esta práctica.

En segundo lugar, esta práctica ven derivada da escaseza de contratación de persoal para cubrir as necesidades básicas de produción que ten a Galega. Unha escaseza que ten unha consecuencia directa como é a perda de calidade dos contidos e o emprego de artimañas que lonxe de encubrir as deficiencias resáltanas aínda máis.

Xuntanza con Rosa Vilas: “Hai que arrimar o ombreiro”

- A Directora da División de Radio Televisión de Galicia pide implicación aos traballadores de cara a dixitalización.

- Os resultados en audiencias da RG e da TVG son lo más de lo más.

- O Agro ou a virtude de “donde dije digo digo Diego.

DIXITALIZACIÓN OU “O PROCESO TRANSFORMADOR”

Do pouco que se saca en claro da xuntanza de hoxe con Rosa Vilas Directora da División de Radio Televisión de Galicia, é que a redacción de informativos vai comezar a trasladarse para a nave provisional a mediados de xuño (data aproximada, e de aí para diante), que vai levar unhas dúas semanas e que o van facer de xeito escalonado, para non cambiar de golpe toda a redacción. Según deu a entender suponse que o farán por programas, Revista, TX Galicia,.... A formación para os traballadores e traballadoras comezará en outubro e teñen previsto finalizar co proceso transformador en marzo de 2018. Din que van converter a “intranet” no principal canle de comunicación do proceso.

A Directora da División de Radio Televisión de Galicia aproveitou a xuntanza para darnos un speech ao William Wallace en Braveheart no que pedía a todo o persoal implicación e “arrimar o ombreiro” para sacar adiante este proceso que cualificou de “transformador” e para o que dixo que había que cambiar de mentalidade (a ver se comezan por algún xefe de departamento). Tamén asegurou que se ían a “procedementar” a producción, xestión e distribución dos contidos audiovisuais para unificar criterios e todos traballemos cos mesmos parámetros (haberá que velo), e deixar de que cada quen faga o que estime oportuno como facemos agora por non ter uns procedementos claros, algo xa demandado dende hai anos pola parte social.

Pedir veu a pedir, pero despois non se veu moita vontade a hora de meterlle o dente a nova clasifición profesional, un tema que levan meses parando porque non queren entrar a negociar os cambios de funcións de algunhas categorías. Pouca explicación deron tamén cando se lles dixo que outubro xa é tarde para comezar a formación e que un dos problemas que ten a CRTVG non son as canles de distribución senón a producción duns contidos que en moitas ocasión teñen unha calidade máis ben mediocre. En fin.....

AUDIENCIAS VENTO EN POPA

Na xuntanza veunos a dar un bo taco de folio coas audiencias da TVG e o EXM da RG, no que veu a dicir que a TVG superou a TV3 que ata o de agora era o referente da FORTA e que a RG é a que máis medra en ointes despois da COPE. Uns datos que haberá que analizar polo miudo xa que así de súpeto é moi difícil facerse unha idea do que pasa.

O AGRO SEGUE NON TODOS OS DÍAS E AMPLÍASE AINDA QUE SE REDUCE

Despois de que a propia Directora da División de Radio Televisión de Galicia dixera que se suprimía pola reducción do 75% da achega da Consellería de Medio Rural,e que unha das directoras xerais na sesión de control do Parlamento asegurara que se mantiña o mesmo orzamento de Medio Rural que o ano pasado, hoxe Rosa Vilas veunos a dicir que sí se mantiña, pero que era un orzamento que xa diminuiran o ano pasado e que con esas cifras non o podían manter. Malia todo dixo que facían o esforzo de deixalo e mesmo amplialo. Cando se lle dixo que o tempo de emisión do programa reducírase nun 50% asegurou que sí se reduciran os días de emisión, que a partir de agora serían martes e mércores, pero que eses días amplían o tempo. Do que non falou foi da ampliación do persoal asignado para facer o traballo 2 persoas, dun equipo que chegou a contar con 5. Tamén dixo que se olvidara na última xuntanza de dicirnos que o orzamento xa se reducira o ano pasado e que estiveran esperando a que este o volveran ampliar... menudencias.....

PROGRAMACIÓN DE VERÁN

O máis salientable é que o Bos Días comezará as 9:00 en xullo e agosto e que se comezará a gravar un concurso no plató 5 que dirixe Paco Lodeiro. En canto a RG o programa nocturno Pensando en tí comezará o luns 22 a emitirse en streaming, e a Radio Galega Música queda sen programación todo o mes de agosto, parece ser que por falta de persoal.

Os membros propostos polo PP no Consello de Administración da CRTVG usurpan as funcións do órgano

Hoxe o Comité de San Marcos deu cumprida resposta a un escrito que cursaron os catro membros do PP do Consello de Administración que xa publicamos. Sen entrar a valorar a súa lamentable resposta o Comité decidiuse a facerlles entender que aínda que falan en nome do Consello o escrito non está dirixido dende o órgano colexiado ao que se lle remitira o Protocolo Anti Manipulación, polo que entende que é unha resposta a título persoal que non ten valor algún.

Tamén se lle fai saber que a indefensión que sofren os traballadores e traballadoras é froito da súa inacción ao non ter creado un Estatuto Profesional que ampare a constitución dun Consello de Informativos previsto na lei dende hai seis anos, xa que é competencia do Consello de Administración o desenvolvemento desa lei.

RECURSOS HUMANOS INCUMPRINDO COAS VACACIÓNS

Hoxe o Comité Intercentros decidiu pedir unha xuntanza urxente con RRHH para tratar as deficiencias que se detectaron na listaxe de vacación. En primeiro lugar publicouse fora de prazo, despois falta moito do persoal da CRTVG que non sabemos se é por erro ou porque deciden ocultar períodos concretos. Dicimos isto porque malia todo segue habendo persoas que teñen vacacións no mes de decembro, mes que dende a dirección non se deixa solicitar para desfrute de vacacións e porque hai períodos concedidos de días cando hai instrucións que impiden pedir períodos inferiores a unha semana.

Nesa xuntanza tamén se quere incluír o atraso nas incidencias de nóminas, pedir os criterio s que usa RRHH para as execucións de sentenzas nos casos do indefinidos, xa que houbo casos nos que non incorporou a traballadores ou traballadoras a plantilla da CRTVG e noutros si, que se incorporen o aumento dos días de maternidade ou paternidade no portal de procedementos e os gastos de programación da Radio Galega. 

FEIJÓO E A EXCELENCIA DO QUE CONVÉN

HINCHANDO O PEITO COA AUDIENCIA E OS RECORTES ORZMAMENTARIOS

O presidente da Xunta en sesión parlamentaria defendeu o 26 de abril o bo traballo da Dirección da CRTVG e o milagre obrado ao facer o mesmo traballo contando cun orzamento que minguou 50 millóns de euros e que é a canle autonómica con mellor audiencia.

O que non conta o presidente é que todo este milagre baséase nun empobrecemento brutal da calidade técnica dos contidos que se emiten, xa sen entrar a valorar o traballo que se lle encarga na súa maioría a produtoras que alimentan a grella da radio e da televisión pública mantendo aos seus traballadores e traballadoras en condicións laborais propias do século XIX.

Un esforzo que tamén esixiu ao persoal a sufrir varios recortes salariais, o aumento da xornada laboral e a diminución á mínima expresión dos chamamentos das listaxes de contratación, que fai que moitos dos equipos estean a traballar baixo mínimos o que obriga, sobre todo nas datas de verán a reemitir contidos xa caducos e a refacer reportaxes emitidas con diferentes versións para disimular a falla man de obra, co resultado dunha degradación do servizo público ata uns niveis ata agora nunca coñecidos.

Tamén hai que contar que dos 90 millóns que gasta ao ano a CRTVG máis de 1 millón vai a parar aos petos dos seus xefes, a través de  complementos salariais de responsabilidade que en ocasións se ven multiplicados por cobros de outros complementos, horas extras incluídas noutros pluses e demais artimañas as que só acceden uns poucos. De feito a cantidade destinada a pagar os xefes no 2016 foi a máis dos últimos 9 anos na TVG.

En canto as audiencias da CRTVG son datos que só aos que acceden as direccións dos distintos departamentos da corporación, así que pouco se pode contrastar do particular. Cocíñanas nos despachos e danlle as voltas que queren para argumentar as súas xustificacións, dando sempre datos que máis lles interesan.

Eliminación do programa O Agro da grella da TVG

-Os traballadores e traballadoras teñen dereito a horas de formación para asistir ao procedemento de acreditación de competencias.

-Apróbase por unanimidade o protocolo de actuación ante as denuncias de manipulación informativa.

-Acórdase esixir a modificación do procedemento de solicitude de vacacións por incumprir o convenio colectivo.

ACABOUSE O AGRO
Ao longo da semana vimos asistindo a unha serie de informacións de corredor nas que se afirmaba que o programa O Agro, que leva en antena dende 1991, deixaba de emitirse. Por unha banda os compañeiros que están a traballar nos seus contidos enteráronse práticamente dun día para outro. Unha compañeira do Comité deu conta na reunión do contido dunha conversa telefónica do luns día 17 con Rosa Vilas, Directora da División de Radio Televisión de Galicia, na que lle aseguraban que o tema tratárase no comité de dirección dese día, no que Pilar Bermúdez, Directora de Informativos, anunciara o remate do programa por mor de que o convenio asinado coa Consellería de Medio Rural remataba e na renovación non ían aportar os cartos que viñan poñendo (reducen os cartos un 75%) así que o programa diario que vai incluido dentro do espezo A Revista deixa de emitirse e unha redactora incorpórase ao Telexornal Mediodía. Mentras os outros dous traballadores seguen elaborando o programa Labranza que se emite a fin de semana.
Dende o Comité pedíuse por teléfono unha xuntanza urxente coa Directora da División de Radio Televisión de Galicia, Rosa Vilas. Mentras esperabamos a resposta chegou unha chamada do director de Recursos Humanos, Jorge Varela, ao presidente do Comité de San Marcos para un encontro breve. Nel díxolle que a supresión do Agro era unha decisión que aínda non estaba tomada ( a todo esto a véspera os dous xa mantiveran unha conversa de xeito informal sobre o particular na que Varela aseguraba que non tiña nin idea, malia que o director de persoal asiste aos comités de dirección). O Comité insiste na xuntanza con Vilas e vai en pleno ao seu despacho para forzar un encontro. De camiño comunícannos que a Dirección de Informativos confirmou que o luns 24 non hai programa. Entregamos a solicitude de xuntanza e agardamos unha resposta “in situ” decididos a non marchar sen pechar un encontro. Finalmente a Directora da División de Radio Televisión de Galicia accede a un encontro ao que asiste tamén o Director de Recursos Humanos na que asegura que hai unha xuntanza pendente coa consellería para tentar recuperar a aportación de Medio Rural. No transcurso da reunión Rosa Vila amosa o seu malestar pola presión do Comité para conseguir falar con ela, no que considera unha actitude “preto do acoso”. Dende CCOO fáiselle ver o malestar que hai entre os traballadores e traballadoras pola falla de información sobre as decisións que afectan a súa labor diaria e polo “ping-pong” de versións que dende a dirección se lle ofreceu ao Comité onde dende cada departamento se ofrecían informacións contradictorias. Vilas asumíu os problemas de comunicación derivados desta decisión e afirmou que a desaparición do Agro non é un tema tan importante para darlle este tratamento.
Despois disto entendemos que a decisión está tomada e que ese último intento por recuperar parte dese financiamento da Consellería de Medio Rural ten moitas probabilidades de ser infrutuoso e que O Agro o luns 24 non se emitirá.
Dende o Comité defendemos e defenderemos o mantemento deste programa histórico, de servizo público, vinculado a un sector productivo estratéxico e cunha identidade propia fondamente arraigada na poboación galega e que debe estar por riba dunha aportación extra do cartos públicos, dos que xa se nutre a CRTVG. Polo que estamos a traballar en máis medidas para amosar o malestar dos traballadores e traballadoras así como tomar medidas de presión encamiñadas a poñer O Agro na grella outra vez.

TEMOS DEREITO A HORAS DE FORMACIÓN PARA A ACREDITACIÓN DE COMPETENCIAS
Despois de que a varias persoas lles rexeitaran permisos con cargo as horas de formación en distintos departamentos para acudir as citas postas polos tribunais no proceso de acreditación de competencias, dende o Comité decidiuse informar aos traballadores e traballadoras que temos dereito a empregar as horas de formación para o proceso de acreditación de competencias, un dereito recollido no Estatuto dos Traballadores e no Convenio. O procedemento que hai que seguir é facer unha comuniación por escrito ao departamento de formación (non vale o formulario que está colgado no portal con encabezado formación e exames). Nalgúns casos a denegación fíxose de xeito verbal, polo que se vos convocan para dar unha resposta procurade ir acompañados dunha testemuña, a ser posible un membro do Comité.

PROTOCOLO ANTI-MANIPULACIÓN
Aprobouse por unanimidade un decálogo de actuación ante as denuncias feitas polos redactores e redactoras que se poidan ver lesionados os seus dereitos e pidan amparo ao Comité. O texto é o seguinte:

Ante o incumprimento do artigo 35 da Lei 9/2011, de 9 de novembro dos Medios Públicos de Comunicación Audiovisual de Galicia, que establece a creación dun Consello de Informativos para a Corporación, o Comité de Empresa da CRTVG asume determinadas funcións contra a manipulación informativa que lle corresponderían a ese órgano.

Co obxecto de garantir a encomenda de servizo público esencial, o dereito fundamental á información e para ofrecerlles o debido amparo aos traballadores e traballadoras da radio e a televisión públicas no seu exercicio profesional, este Comité, seguindo o acordo do seu pleno celebrado o día 13 de marzo de 2017, dótase das seguintes normas de actuación para os casos nos que o persoal denuncie exercicios de manipulación sobre o seu labor informativo.

1.- O Comité estudará cada caso, sexa denunciado por unha persoa ou por un colectivo, recollendo as probas que considere necesarias e contactando co persoal implicado.

2.- O Comité contactará mediante nota interna coa Dirección de Informativos ou Programas e coa dirección do informativo, programa ou departamento responsable da emisión ou difusión da noticia en cuestión, para denunciar a práctica e, de ser necesario, pedir as aclaracións pertinentes

3.-.Transcorridas 48 horas desde a notificación á dirección, no caso de considerar lesionado algún dereito, o Comité emitirá unha nota pública denunciando a manipulación, agás nos casos nos que pola súa gravidade esixa unha reposta urxente .

4.- O Comité pedirá unha xuntanza coa dirección do departamento responsable para recadar a súa posición.

5.- O Comité porá o caso en coñecemento do Director Xeral e do Consello de Administración mediante nota interna.

6.- Daráselle traslado tamén do acontecido ao Colexio de Xornalistas de Galicia, para que se pronuncie se así o considera.

7.- Informarase igualmente a todos os grupos parlamentarios, para que adopten as medidas que estimen oportunas no marco da Comisión Parlamentaria Permanente non Lexislativa de Control da Corporación da RTVG .

8.- Presentarase unha queixa ante a Valedora do Pobo.

9.- No caso de existir solicitudes de amparo confrontadas, o Comité trasladaralle por escrito a súa resolución a cada unha das partes.

10.- O Comité observará especialmente que non se lesionen os dereitos das persoas denunciantes, garantíndolles a confidencialidade se o solicitan.

O Comité de empresa asume estas funcións con carácter temporal. As mesmas decaerán coa constitución do Consello de Informativos, órgano interno de participación dos profesionais da información da Corporación RTVG que, segundo a Lei 9/2011, terá por obxectivos “velar pola independencia, pola veracidade e pola obxectividade dos contidos informativos difundidos por todas as súas canles”.

XUNTANZA CO CONSELLO DE ADMINISTRACIÓN
Despois de manter xuntanzas cos distintos grupos parlamentarios sobre o problema da manipulación informativa, o Comité solicitará unha xuntanza formal co pleno do Consello de Administración, despois da voluntariedade amosada na xuntaza do grupo Popular de instar aos membros do Consello propostos por eles a acceder a reunirse cos representantes dos traballadores e traballadoras..... Veremos en que queda.

A SOLICITUDE DAS VACACIÓNS INCUMPRE O CONVENIO
A ferramenta habilitada para a solicitude das vacacións incumple o convenio colectivo en varios artigos ademais de condicionar a elección de datas dun xeito non acordado nas negociacións. O Comité vai esixir que se amplie o prazo para que esté aberto a cursar as solicitudes en todo o primeiro trimestre do ano e que se eliminen as limitacións por datas por impedir unha escolla libre. Tamén denunciará que a CRTVG incumpre o convenio de xeito reiterado non publicando a listaxe das vacacións antes do 15 de abril.

PROTOCOLO ANTI MANIPULACIÓN

Ante o incumprimento do artigo 35 da Lei 9/2011, de 9 de novembro dos Medios Públicos de Comunicación Audiovisual de Galicia, que establece a creación dun Consello de Informativos para a Corporación, o Comité de Empresa da CRTVG asume determinadas funcións contra a manipulación informativa que lle corresponderían a ese órgano.

Co obxecto de garantir a encomenda de servizo público esencial, o dereito fundamental á información e para ofrecerlles o debido amparo aos traballadores e traballadoras da radio e a televisión públicas no seu exercicio profesional, este Comité, seguindo o acordo do seu pleno celebrado o día 13 de marzo de 2017, dótase das seguintes normas de actuación para os casos nos que o persoal denuncie exercicios de manipulación sobre o seu labor informativo.

1.- O Comité estudará cada caso, sexa denunciado por unha persoa ou por un colectivo, recollendo as probas que considere necesarias e contactando co persoal implicado.

2.- O Comité contactará mediante nota interna coa Dirección de Informativos ou Programas e coa dirección do informativo, programa ou departamento responsable da emisión ou difusión da noticia en cuestión, para denunciar a práctica e, de ser necesario, pedir as aclaracións pertinentes

3.-.Transcorridas 48 horas desde a notificación á dirección, no caso de considerar lesionado algún dereito, o Comité emitirá unha nota pública denunciando a manipulación, agás nos casos nos que pola súa gravidade esixa unha reposta urxente .

4.- O Comité pedirá unha xuntanza coa dirección do departamento responsable para recadar a súa posición.

5.- O Comité porá o caso en coñecemento do Director Xeral e do Consello de Administración mediante nota interna.

6.- Daráselle traslado tamén do acontecido ao Colexio de Xornalistas de Galicia, para que se pronuncie se así o considera.

7.- Informarase igualmente a todos os grupos parlamentarios, para que adopten as medidas que estimen oportunas no marco da Comisión Parlamentaria Permanente non Lexislativa de Control da Corporación da RTVG .

8.- Presentarase unha queixa ante a Valedora do Pobo.

9.- No caso de existir solicitudes de amparo confrontadas, o Comité trasladaralle por escrito a súa resolución a cada unha das partes.

10.- O Comité observará especialmente que non se lesionen os dereitos das persoas denunciantes, garantíndolles a confidencialidade se o solicitan.

O Comité de empresa asume estas funcións con carácter temporal. As mesmas decaerán coa constitución do Consello de Informativos, órgano interno de participación dos profesionais da información da Corporación RTVG que, segundo a Lei 9/2011, terá por obxectivos “velar pola independencia, pola veracidade e pola obxectividade dos contidos informativos difundidos por todas as súas canles”.

Acordos da comisión de listaxes: cada baixa xera un contrato novo

Na última xuntanza do Comisión de Listaxes chegouse ao acordo de que nas xestión dos chamamentos cada modificación nos permisos ou baixas dos traballadores xere un novo chamamento. Ata o momento RRHH prorrogaba os contratos de xeito unilateral e arbitrario para un mesmo candidato na listaxe como se fose unha mesma causa cando ao mellor eran dúas ou tres causas distintas. Por exemplo: unha persoa que está de baixa e pega un permiso despois desa baixa, como poden ser as vacacións ou unha baixa a que lle segue unha maternidade, permiso de lactancia e vacacións. Esta modificación que se lle esixiu dende a parte social veu motiva porque detectouse que en ocasións dende RRHH o que facían era non asignar nun primeiro momento a baixa e ir outorgando contratos de máis curta duración ata que chegaba a unha persoa en concreto coa que si activaban a substitución desa baixa a que encadeaban os distintos permisos.

Tamén se esixiu que quedara rexistrado na acta da xuntanza que no caso de aparecer varios contratos un mesmo día se lle ofreza o de maior duración ao primeiro candidato ou candidata na listaxe, despois de detectar un caso no que a unha persoa que estaba no primeiro posto se lle adxudicara un contrato de días mentres que ao seguinte se lle ofreceu un permiso de seis meses no mesmo día.

Non se chegou a acordo na pretensión de RRHH de manter unha excepcionalidade perenne nos chamamentos de curta duración da listaxe de técnico de control.

Xuntanza con En Marea

Esta xuntanza está dento da xeira de contactos que estamos a manter cos grupos parlamentarios para denunciar a manipulación informativa que motivou a denuncia do compañeiro Luís Quintas.

http://www.sermosgaliza.gal/articulo/social/na-tvg-ocultase-parte-da-realidade-galiza-non-satisfai-egolatria-gobernantes/20170314211652055712.html

Polo grupo parlamentario En Marea quedou demostrado o interese por erradicar estas preocupantes manobras dentro da televisión pública galega e tamén a vontade de iniciar contactos cos distintas forzas políticas para tentar desatoar a situación na que se encontra a Lei de Medio Públicos de Galicia 9/2011 onde está recollido a creación de Estatuto Profesional e o Consello de Informativos. Tamén expuxeron a posibilidade de facer unha pregunta no Parlamento sobre o particular despois de que non se lles admitira a tramitada na Comisión de control para a sesión que se celebra este xoves 30 de marzo e da que tería que dar explicacións o director Xeral Alfonso Sánchez Izquierdo. Unha pregunta para a Comisión de control que, aseguraron, malia presentarse en tempo e forma e que quedará para o vindeiro mes de abril.

Como quedará para o próximo mes de abril a pregunta do BNG na mesma comisión e sobre o mesmo tema, desta volta por non entrar en prazo, segundo nos comunicaron do grupo parlamentario.

NON A MANIPULACION NA CRTVG

Esta semana o Comité de San Marcos como consecuencia da petición de amparo do compañeiro Luís Quintas, denunciando un caso de manipulación dunha reportaxe súa, acudimos aos grupos parlamentarios para que tiveran información de primeira man.

Das xuntanzas cos grupos parlamentarios do PSdeG e BNG arrancamos o compromiso de meter na axenda política deste mes de abril a necesidade de desenvolver a a lei 9/2011, a Lei de Medios Públicos Audiovisuais de Galicia aprobada hai xa case seis anos e que contempla un Estatuto Profesional e un Consello de Informativos non desenvolvidos e que son unha ferramenta que pode garantir un traballo profesional e protexer aos traballadores e traballadoras dos abusos que sofren no transcurso do desenvolvemento da súa profesión.

Por suposto, tamén pedirán explicacións polo miúdo ao director xeral da CRTVG na comisión de control do Parlamento que se celebrará o vindeiro 30 de marzo. Xa que Sánchez Izquierdo non respondeu a petición dos seus propios traballadores de información sobre este grave caso de manipulación, unha petición feita a través dunha nota interna que lle enviou o Comité, esperemos que perante a comisión si saiba explicar polo miúdo os porques do caso e non garde silencio.

O luns manteremos unha xuntanza con En Marea da que daremos conta. O Partido Popular contestou que recibira a petición do Comité para unha xuntanza e que xa nos avisaban.........

http://www.sermosgaliza.gal/articulo/social/na-tvg-ocultase-parte-da-realidade-galiza-non-satisfai-egolatria-gobernantes/20170314211652055712.html

Un redactor da TVG pide amparo pola emisión dunha noticia súa manipulada

Eliminaron as críticas a Xunta de Galicia e un parágrafo da información.

Esta mañá tratouse a denuncia por manipulación que fixo chegar ao Comité o compañeiro Luis Quintas.

O luns, 6 de marzo no Galicia Serán emitiron unha noticia premeditadamente recortada para eliminar partes que se emitiran na edición do mediodía.

Luis, redactor de longa traxectoria e recoñecido prestixio, elaborou unha peza informativa sobre o cultivo de ostras en Galicia baseado en entrevistas feitas na Universidade de Santiago a un equipo de investigación en acuicultura. Unhas entrevistas que non buscou el senón que, neste caso, llas asignaron a primeira hora da mañá sen tempo para documentarse sobre o tema do que versaban ditas entrevistas. Despois elaborou esta información para o programa Galicia Noticias Mediodía:

http://www.crtvg.es/informativos/investigadores-galegos-reducen-a-metade-o-tempo-de-cria-da-ostra-autoctona-2777439

Na edición da tarde, Galicia Noticias Serán, quedou “MUTILADA”, como o mesmo traballador afirma, aínda que mantiveron a súa “voz en off”. Esta mutilación foi para evitar que os espectadores puideran escoitar a declaración dun técnico que criticaba a actitude do goberno autonómico na cría e cultivo de moluscos en Galicia. Ese técnico dicía que a Xunta está desaparecida na atención a explicaba o porqué en 22 segundos de intervención.

Tamén suprimiron o parágrafo final da noticia, que dicía:

"Este especialista en cultivo de moluscos afirma que á Xunta non lle interesa aumentar a produción destas especies e lembra que nas depuradoras galegas predomina o marisco foráneo".

http://www.crtvg.es/informativos/investigadores-galegos-descobren-como-reducir-o-tempo-de-cria-a-metade-da-ostra-autoctona-2777981

As excusas e argumentacións falsas que dan para casos coma este que se dan tódolos días na redacción é que a noticia é moi longa, para repetila integramente.

Dende o Comité de San Marcos elaboramos unha nota pública, pedimos o amparo do Colexio de Xornalista, comunicamos esta lamentable e intolerable situación ao Consello de Administración e pedimos explicacións Dirección Xeral, Dirección de Informativos, e Dirección do programa. Tamén pedimos unha xuntanza cos grupos parlamentarios para darlles conta do acontecido. Así mesmo estamos a traballar nun protocolo de amparo para as traballadoras e traballadores que se enfrontes a unha situación semellante.

Tamén esiximos que cesen as prácticas de manipulación e a posta en marcha inmediata do Consello de Informativos comprometido na Lei de Medios. Ademais que se asinen os traballos con rótulos onde apareza o nome da redactora ou redactor como xeito de visualizar o traballo ben feito por parte das traballadoras e traballadores..

O Comité de San Marcos rexeita enerxicamente que se faga este uso perverso da información elaborada por un xornalista con criterios profesionais e non dependentes do que lles gusta oír aos gabinetes de comunicación en San Caetano.

Dentro doutro orde de asuntos tamén se tratou as irregularidades de 11 traballadoras que denunciaron durante o proceso de acreditación de competencias. Aseguran que dende o departamento de Recursos Humanos influíron nun centro que convocou probas prácticas contempladas no proceso para que mudara os horarios despois de que tiveran unha data fixada. En concreto a problemática que se plantexa é que estaban convocadas durante todo un día para a súa avaliación práctica en Ferrol e agora convocáronas durante cinco días só polas tardes, o que ocasiona un maior trastorno e gasto as traballadoras, ademais de non podelas incluír nas horas de formación a que teñen dereito. Estase a espera dunha resposta do departamento de RRHH para que explique o porqué desa inxerencia.

A calidade do material enviado polo novo correspondente en O Porto tamén foi abordado.

http://www.crtvg.es/informativos/iberdrola-construe-tres-presas-no-rio-tamega-xerando-preto-de-13-500-postos-de-traballo

Segundo o criterio do Comité as condicións do traballo resultante non son as desexables para os estándares de calidade. O Comité decidiu pedir unha xuntanza coa Directora da División de Radio Televisión de Galicia, Rosa Vilas, para que explique cales son os medios cos que conta o traballador asinado a tales tarefas e cales foran as condicións nas que se estableceu o tema desta reportaxe.

Noutra orde de cousas tratouse o cobro de dous complementos de responsabilidade por parte dunha persoa, o que se consideraría a vulneración do convenio colectivo. Dende RRHH aseguraron que se trataba dun erro que xa corrixiron, aínda que a parte social non ten os datos suficientes para corroborar tal afirmación. Por iso se acordou pedir a dito departamento que envíe a información sobre os traballadores ao día e non con meses de atraso.

Dentro do proxecto piloto de “radio en streaming” que se está a facer no programa A Tarde o emprego das cámaras de emisión do estudio 4 da Radio Galega están abertas en ocasións as 24 horas tal e como comunicaron varios traballadores e traballadoras. Dende a Dirección da División de Radio Televisión de Galicia asegurouse que só unha unha cámara estaría operativa de 16:00 a 19:00 durante a emisión do programa, por iso se acordou comunicar a empresa que cumpra coas directrices expostas por Rosa Vilas.

O 8 DE MARZO A CRTVG TAMÉN PARA

 O Comité Intercentros da CRTVG súmase á CONVOCATORIA DE FOLGA MOTIVADA POLO PARO INTERNACIONAL DE MULLERES convocado para mañá mércores 8 de marzo e chama a todas as traballadoras e traballadores dos medios públicos a secundar os paros parciais que se producirán nas seguintes franxas horarias: 

de 12:00 a 14:00 horas 

de 18:00 a 20:00 horas 

de 21:00 a 23:00 horas 

Na tarde, o Intercentros recoméndalle ao persoal ao que lle coincidan dúas franxas na súa quenda que escolla unha delas para parar. Co ánimo de manter o espíritu das convocantes internacionais (paro convocado por mulleres para mulleres) o comité pediulle á empresa que permitise que aquelas compañeiras que recibisen a carta de servizos mínimos puidesen voluntariamente intercambiar esa convocatoria que impide realizar o paro cun compañeiro que voluntariamente se preste a substituíla no servizo mínimo. 

Aquelas persoas que non poidan parar por estar en mínimos, poderán amosar o seu apoio a esta convocatoria participando nas CONCENTRACIÓNS que se convocarán NO CONTROL DE ACCESO á CRTVG ás 12:00, ás 18:00 e as 21:00 horas, aproveitando os seus 20 minutos de descanso. 

Lembrámoslle ao persoal que secunde o paro que haberá que deixar constancia do mesmo fichando nos tornos de saída, onde nos concentraremos para deixar claro que SE AS MULLERES PARAN, O MUNDO PARA. 

San Marcos a 7 de marzo de 2017

MAÑÁ DE ACORDOS NO INTERCENTROS

Na xuntanza do día de hoxe do Comité Intercentros acordouse pedirlle a empresa que comunique o traslado temporal de traballadores para cubrir baixas nas delegacións, unhas adscricións temporais que nalgúns casos fanse de xeito arbitrario. O Comité tamén lle vai pedir información dos cambios de quenda entre traballadores, que agora se está a facer entre os distintos centros de traballo da CRTVG e a actualización dos permisos de maternidade e paternidade que ampliaron os seus prazos e as traballadoras e traballadores teñen que presentar formularios adicionais xa que os novos permisos non están ao día no portal de incidencias informáticas. En canto ao aumento de coordinadores no departamento de informativos da TVG vaise pedir que a empresa concrete as funcións que fai cada un, xa que ven de aumentar o número de redactores xefes.

Fora xa do Comité os distintos representantes acordamos pedirlle de xeito urxente a empresa unha xuntanza para tratar a clasificación profesional despois de 8 meses sen convocar a comisión creada para tal efecto.

Santiago de Compostela, 1 de marzo de 2017

PROGRAMCIÓN CONTINUISTA, PROBAS DE STREAMING NA RADIO E CORRESPONSALÍA EN OPORTO

Na xuntanza do día de hoxe do Comité de San Marcos cos Directora de División da Radio Televisión, Rosa Vilas, tratouse a nova programación, que seguirá sen novidade agás dunha nova reformulación dun programa que se vai gravar a partir da semana que ven chamado As Luces. Serán 13 programas que aínda non se sabe en que franxa se van emitir e que presentará Xosé Carlos Caneiro, a través dunha contratación artística, xustificado por Rosa Vilas por ser un persoeiro que aporta valor engadido. Dende a parte social reclamouse que se de a oportunidade as traballadoras e traballadores da casa a presentar este tipo de programas.

Na radio a partir do seis de marzo comezará en streaming a retransmisión do programa a A Tarde na radio. Un proxecto piloto que será a proba para despois facer extensible a máis programación. Despois de que CRTVG quixera comezar a emitir tres programas e o malestar dun grupo de traballadores pola falla de previsión e comunicación dos procedementos que se van seguir nas retransmisións en streaming, procedeuse a facer esta proba contando coa voluntariedade do equipo de A Tarde.

A comezos de marzo tamén está previsto que comece a traballar en Oporto como correspondente Alfonso Pérez Caneiro ao abeiro do convenio asinado entre a CRTVG e a RTP para colaborar en proxectos comúns como a serie Vidago Palace.

CAMBIO DE CRITERIOS NA READMSIÓN DE DESPEDIDOS

Na xuntanza do día de hoxe do Comité Intercentros acordouse pedir unha xuntanza coa empresa para que aclare cales son os criterios cos que está a tratar os despedimentos improcedentes. Ata o momento o que facía era pagar a indemnización, pero nun caso recente readmitiu a unha persoas, polo que a parte social esixe unha explicación deste cambio de actitude e solicitará un trato igualitario para todas a traballadoras e traballadores.

Asuntos propios.

Tamén se acordou pedirlle a empresa unha resposta concreta sobre as solicitudes de asuntos propios. En novembro fíxose unha proposta pola parte social para limitar o tempo de resposta as peticións de asuntos particulares por parte dos xefes de departamento, unha resposta que aínda estamos a esperar.